ജിദ്ദ: ഇന്ത്യന് കോണ്സുലേറ്റ് ജനറലുമായി സഹകരിച്ച് ഗുഡ്വില് ഗ്ലോബല് ഇനിഷ്യേറ്റീവ് (ജിജിഐ) സംഘടിപ്പിക്കുന്ന സൗദി ഇന്ത്യ ഫെസ്റ്റിവല് സീസണ്-1 ജനുവരി 19 ന് വെള്ളിയാഴ്ച വൈകീട്ട് ജിദ്ദ ഇന്റര്നാഷണല് ഇന്ത്യന് സ്കൂളില് നടക്കും. അറബ് ഇന്ത്യാ സൗഹൃദപ്പെരുമയും തന്ത്രപ്രധാന പങ്കാളിത്തവും അടയാളപ്പെടുത്തുന്നതായിരിക്കും സാംസ്കാരികോത്സവം.
അഞ്ച് സഹസ്രാബ്ദത്തെ ഉറ്റ സൗഹൃദപ്പെരുമ എന്ന പ്രമേയത്തിലുള്ള ഫെസ്റ്റിവലിന്റെ ബ്രോഷര് പ്രകാശനം കോണ്സുലേറ്റില് നടന്ന ചടങ്ങില് കോണ്സല് ജനറല് മുഹമ്മദ് ഷാഹിദ് ആലം നിര്വഹിച്ചു. ഫെസ്റ്റിവലിന്റെ കോണ്സുലേറ്റ് കോര്ഡിനേറ്റര് കൂടിയായ ഹജ്ജ് ആന്റ് കമേഴ്സ്യല് കോണ്സല് മുഹമ്മദ് അബ്ദുല് ജലീല്, പ്രസ്, ഇന്ഫര്മേഷന്, കള്ച്ചര് വിഭാഗം കോണ്സല് മുഹമ്മദ് ഹാഷിം, ജിജിഐ പ്രസിഡന്റ് ഹസന് ചെറൂപ്പ, ജനറല് സെക്രട്ടറി ഇസ്ഹാഖ് പൂണ്ടോളി, വൈസ് പ്രസിഡന്റ് ജലീല് കണ്ണമംഗലം, ഇവെന്റ് കണ്വീനര് സക്കരിയാ ബിലാദി എന്നിവര് പ്രകാശനച്ചടങ്ങില് സംബന്ധിച്ചു.
About the Author
