തിരുവനന്തപുരം: സി പി എമ്മു മായി ചേര്ന്ന് സംയുക്ത സമരങ്ങളിലോ സമ്മേളനങ്ങളിലോ പങ്കെടുക്കരുതെന്ന് കോണ്ഗ്രസ് പ്രവര്ത്തകര്ക്ക് കർശന നിർദ്ദേശവുമായി കെ പി സി സി.
സഹകരണ ബാങ്കുകളുടെ വിശ്വാസ്യത തകര്ത്ത സിപിഎമ്മുമായി ഒരു കാരണവശാലും സംയുക്ത സമരങ്ങളിലോ സമ്മേളനങ്ങളിലോ കോണ്ഗ്രസ് പ്രവര്ത്തകര് പങ്കെടുക്കരുതെന്നും സഹകരണ മേഖലയുടെ സംരക്ഷണത്തിനും വിശ്വാസ്യത വീണ്ടെടുക്കാനും കോൺഗ്രസ് പ്രതിജ്ഞാബദ്ധമാണെന്നും കെപിസിസി ജനറല് സെക്രട്ടറി ടി.യു രാധാകൃഷ്ണന് പറഞ്ഞു.
അര്ത്ഥശങ്കയ്ക്ക് ഇടമില്ലാത്തവിധം കെപിസിസി യോഗം തീരുമാനിച്ച ഈ നിലപാടിന് കടകവിരുദ്ധമായി ആരെങ്കിലും പ്രവര്ത്തിച്ചാല് ശക്തമായ സംഘടനാ നടപടികള് സ്വീകരിക്കുമെന്ന് ടി.യു രാധാകൃഷ്ണന് പ്രസ്താവനയിലൂടെ പറഞ്ഞു. സിപിഎമ്മിന് നില്ക്കള്ളിയില്ലാതായപ്പോഴാണ് കോണ്ഗ്രസിന്റെ പിന്തുണ തേടുന്നത്.സിപിഎം സഹകരണ മേഖലയില് നടത്തിയ തീവെട്ടിക്കൊള്ളയുടേയും ശതകോടികളുടെ ബിനാമി ഇടപാടുകളുടേയും വിഴുപ്പുപാണ്ഡം ചുമക്കേണ്ട ആവശ്യം കോണ്ഗ്രസിനില്ല. ജനങ്ങളാല് ഒറ്റപ്പെട്ട സിപിഎം രക്ഷപെടാന് വേണ്ടിയാണ് യോജിച്ചുള്ള സമരത്തിന് കോണ്ഗ്രസിന്റെ പിന്തുണ തേടുന്നത്.ഈ വിഷയത്തിൽ ഒറ്റക്ക് സമരം ചെയ്യാനുള്ള ആർജ്ജവവും തന്റേടവും സംഘടനാബലവും കോൺഗ്രസിനുനടന്നും അദ്ദേഹം പറഞ്ഞു.
സിപിഎം ഭരണസമിതി വരുത്തിവച്ച ബാധ്യത മറ്റു സഹകരണ ബാങ്കുകളിലെ ഫണ്ട് ഉപയോഗിച്ച് പരിഹരിക്കാനുള്ള സര്ക്കാരിന്റെ തീരുമാനത്തോട് ഒരിക്കലും യോജിക്കാനാവില്ലെന്നും കോണ്ഗ്രസ് ഭരണത്തിലുള്ള സഹകരണ ബാങ്കുകള് ഇതിനോട് സഹകരിക്കേണ്ടതില്ലെന്നും കെപിസിസി യോഗം തീരുമാനിച്ചിട്ടുണ്ടെന്ന് രാധാകൃഷ്ണന് പറഞ്ഞു
About the Author
