പ്രശസ്ത മലയാളം ഗാനരചയിതാവ് മങ്കൊമ്പ് ഗോപാലകൃഷ്ണൻ (78) അന്തരിച്ചു. ഹൃദയാഘാതത്തെ തുടർന്ന് വൈകീട്ട് 5 മണിയോടെ കൊച്ചിയിലെ സ്വകാര്യ ആശുപത്രിയിൽ വച്ചായിരുന്നു അന്ത്യം. ശാരീരിക അവശതകളെ തുടർന്ന് ഒരാഴ്ചയായി ആശുപത്രിയിൽ ചികിത്സയിലായിരുന്നു അദ്ദേഹം. ആലപ്പുഴ മങ്കൊമ്പ് സ്വദേശിയായ ഗോപാലകൃഷ്ണൻ മലയാളത്തിൽ പ്രശസ്തമായ നിരവധി ഗാനങ്ങൾ രചിച്ചു.
കാളിദാസന്റെ കാവ്യഭാവന, ലക്ഷാർച്ചന കണ്ടു മടങ്ങുമ്പോൾ, ഇളം മഞ്ഞിൻ കുളിരുമായൊരു കുയിൽ, വെളിച്ചം വിളക്കണച്ചു, നാടൻ പാട്ടിന്റെ മടിശ്ശീല, കണ്ണാ നീ ഉറങ്ങെടാ തുടങ്ങി നിരവധി ഗാനങ്ങൾ അദ്ദേഹം രചിച്ചു. 1971ൽ പുറത്തിറങ്ങിയ വിമോചന സമരം ആണ് ആദ്യത്തെ ചലച്ചിത്രം. തുടർന്ന് ഹരിഹരൻ ഉൾപ്പെടെ ഒട്ടേറെ സംവിധായകരുടെ സിനിമകൾക്ക് ഗാനങ്ങൾ രചിച്ചു. എം.എസ്.വിശ്വനാഥനാണ് മങ്കൊമ്പിന്റെ പല ഗാനങ്ങൾക്കും ഈണം പകർന്നത്. മലയാളത്തിൽ ഇറങ്ങിയ പല തെലുങ്ക് ചലച്ചിത്രങ്ങളിലെയും മലയാള ഗാനങ്ങൾക്കു പിന്നിൽ മങ്കൊമ്പ് ഗോപാലകൃഷ്ണനായിരുന്നു.
1947ല് കുട്ടനാട്ടിലെ മങ്കൊമ്പ് ഗ്രാമത്തില് ജനിച്ചു. അച്ഛന് ഗോവിന്ദന് നായര്. ആദ്യ ചലച്ചിത്രം വിമോചനസമരം. 1975ല് ഹരിഹരന് സംവിധാനം ചെയ്ത അയലത്തെ സുന്ദരി എന്ന ചിത്രത്തിലെ ഗാനങ്ങള് രചിച്ചു. ഇതിലെ ‘ലക്ഷാര്ച്ചന കണ്ടു മടങ്ങുമ്പോള്’എന്ന ഗാനം അദ്ധേഹത്തെ പ്രശസ്തനാക്കി. ഹരിഹരന് എന്ന സംവിധായകനു വേണ്ടിയായിരുന്നു മങ്കൊമ്പ് ഗോപാലകൃഷ്ണന് എറ്റവും കൂടുതല് ഗാനങ്ങള് രചിച്ചത്. അദ്ദേഹത്തിന്റെ വരികള്ക്ക് ഏറ്റവും കൂടുതല് തവണ ഈണം പകര്ന്നത് എം.എസ്. വിശ്വനാഥന് ആയിരുന്നു. കൂടാതെ പത്തോളം ചിത്രങ്ങള്ക്ക് കഥയും തിരക്കഥയും രചിച്ചിട്ടുണ്ട്. ഏറ്റവും കൂടുതല് ചിത്രങ്ങള് മലയാളത്തിലേക്ക് മൊഴിമാറ്റിയത് മങ്കൊമ്പ് ഗോപാലകൃഷ്ണന് ആണ്. ബാഹുബലി ഉള്പ്പെടെ 200 ചിത്രങ്ങളില് അദ്ദേഹം സഹകരിച്ചിട്ടുണ്ട്.
About the Author
