നവംബർ ഒന്ന് മലയാളിയുടെ മനസ്സിൽ എന്നും അഭിമാനത്തിന്റെയും ഓർമകളുടെയും ദിനമാണ്. ഭാഷയുടെയും സംസ്കാരത്തിന്റെയും പൈതൃകത്തിന്റെയും അടിസ്ഥാനത്തിൽ മലയാളികൾക്ക് ഒരു പ്രത്യേക ഭൂപ്രദേശം എന്ന സ്വപ്നം യാഥാർഥ്യമായ ദിനം. 1956 നവംബർ ഒന്നിന് തിരുവിതാംകൂർ, കൊച്ചി, മലബാർ പ്രദേശങ്ങൾ ഒന്നിച്ചുചേർന്നാണ് കേരളം എന്ന സംസ്ഥാനം രൂപംകൊണ്ടത്. ഐക്യകേരളമെന്ന മലയാളിയുടെ ദീർഘകാല സ്വപ്നത്തിന് സാക്ഷാത്കാരം ലഭിച്ച ആ ദിനമാണ് കേരളപ്പിറവി.
ഭാഷാടിസ്ഥാനത്തിൽ രൂപംകൊണ്ട സംസ്ഥാനങ്ങളിൽ കേരളത്തിന് സവിശേഷമായ സ്ഥാനമുണ്ട്. സാക്ഷരതയിലും വിദ്യാഭ്യാസത്തിലും ആരോഗ്യരംഗത്തും സാമൂഹിക പുരോഗതിയിലും കേരളം കൈവരിച്ച നേട്ടങ്ങൾ ലോകശ്രദ്ധ നേടിയവയാണ്. മതസൗഹാർദവും മതേതരത്വവും സാമൂഹിക നീതിയും ജനാധിപത്യബോധവും കേരളത്തിന്റെ സാമൂഹിക ജീവിതത്തിന് കരുത്തുപകരുന്നു.
കേരളം എന്നത് ഭൂപടത്തിലെ ഒരു ചെറിയ ഭൂപ്രദേശം മാത്രമല്ല. അതൊരു സംസ്കാരമാണ്, ജീവിതരീതിയാണ്, മനുഷ്യബന്ധങ്ങളുടെ ഊഷ്മളതയാണ്. ഓണവും വിഷുവും പെരുന്നാളും ക്രിസ്മസും ഒരുമയോടെ ആഘോഷിക്കുന്ന ജനതയുടെ നാടാണിത്. ഭാഷയിലും വേഷത്തിലും ഭക്ഷണത്തിലും കലകളിലും സാഹിത്യത്തിലും തനിമ നിലനിർത്തുമ്പോഴും ലോകത്തിന്റെ മാറ്റങ്ങളെ ഹൃദയപൂർവം സ്വീകരിച്ച നാടും കൂടിയാണ് കേരളം.
പ്രവാസലോകത്തുള്ള മലയാളികൾക്ക് കേരളപ്പിറവി ദിനത്തിന് മറ്റൊരു പ്രത്യേകത കൂടിയുണ്ട്. ലോകത്തിന്റെ വിവിധ ഭാഗങ്ങളിൽ ജീവിതവും ജോലിയും സ്വപ്നങ്ങളും കെട്ടിപ്പടുക്കുമ്പോഴും മലയാളിയുടെ മനസ്സിൽ എന്നും ഒരു കേരളമുണ്ട്. നാട്ടിലെ പച്ചപ്പും മഴയും പുഴകളും കടലും ഉത്സവങ്ങളും കുടുംബബന്ധങ്ങളും സൗഹൃദങ്ങളും പ്രവാസിയുടെ ഓർമകളിൽ നിറഞ്ഞുനിൽക്കുന്നു. നാടിന്റെ സാമ്പത്തികവും സാമൂഹികവുമായ വളർച്ചയിൽ പ്രവാസികൾ നൽകിയ സംഭാവനകൾ വിസ്മരിക്കാനാവാത്തതാണ്.
എന്നാൽ ആഘോഷങ്ങൾക്കൊപ്പം ആത്മപരിശോധനയ്ക്കുമുള്ള അവസരമാകണം കേരളപ്പിറവി. തൊഴിലില്ലായ്മ, യുവജനങ്ങളുടെ വിദേശ കുടിയേറ്റം, കാർഷികമേഖലയിലെ പ്രതിസന്ധികൾ, പരിസ്ഥിതി സംരക്ഷണം, മാലിന്യനിർമാർജനം, വർധിച്ചുവരുന്ന സാമൂഹിക അസമത്വങ്ങൾ തുടങ്ങിയ വെല്ലുവിളികൾക്ക് പരിഹാരം കണ്ടെത്തേണ്ടതുണ്ട്. പ്രകൃതിയെ സംരക്ഷിച്ചും വികസനത്തിന് പുതിയ വഴികൾ തുറന്നും വരുംതലമുറയ്ക്ക് സുരക്ഷിതവും സമൃദ്ധവുമായ കേരളം കൈമാറാൻ നമുക്ക് കഴിയണം.
രാഷ്ട്രീയത്തിനും മതത്തിനും ജാതിക്കും പ്രാദേശികതയ്ക്കും അതീതമായി മലയാളി എന്ന ഒരൊറ്റ വികാരത്തിൽ ഒന്നിച്ചുനിൽക്കാൻ കഴിയുമ്പോഴാണ് കേരളപ്പിറവിയുടെ യഥാർഥ സന്ദേശം സാർത്ഥകമാകുന്നത്.
നമ്മുടെ ഭാഷയെ സ്നേഹിക്കാം, സംസ്കാരത്തെ സംരക്ഷിക്കാം, നാടിന്റെ നന്മയ്ക്കായി കൈകോർക്കാം. പഴമയുടെ പൈതൃകം കാത്തുസൂക്ഷിച്ച് പുതുമയുടെ പ്രതീക്ഷകളിലേക്ക് മുന്നേറുന്ന കേരളമാണ് നമുക്ക് വേണ്ടത്.
ലോകത്തിന്റെ ഏതു കോണിലായാലും മലയാളിയുടെ ഹൃദയത്തിൽ കേരളമുണ്ട്. ആ കേരളത്തെ കൂടുതൽ മനോഹരവും സമാധാനപൂർണവും വികസിതവുമായ നാടാക്കി മാറ്റുക എന്നത് ഓരോ മലയാളിയുടെയും ഉത്തരവാദിത്വമാണ്.
എല്ലാ വായനക്കാർക്കും ജി സി സി ടൈംസ്ന്റെ കേരളപ്പിറവി ദിനാശംസകൾ
About the Author
