തിരുവനന്തപുരം:യാത്രക്കാര്ക്ക് സുരക്ഷിത ഭക്ഷണം ഉറപ്പാക്കുന്നതിനായി ഫുഡ് സേഫ്റ്റി ആന്റ് സ്റ്റാന്റേര്ഡ്സ് അതോറിറ്റി ഓഫ് ഇന്ത്യയുടെ (എഫ്എസ്എസ്എഐ) നേതൃത്വത്തിലുള്ള ഈറ്റ് റൈറ്റ് ഇന്ത്യാ മൂവ്മെന്റിന് കീഴിലുള്ള സംരംഭങ്ങളിലൊന്നായ ഈറ്റ് റൈറ്റ് റെയില്വേ സ്റ്റേഷന് പദ്ധതിയി പ്രകാരം കേരളത്തിലെ 21 സ്റ്റേഷനുകള്ക്ക് അംഗീകാരം ലഭിച്ചു. രാജ്യത്ത് 114 റയില്വേ സ്റ്റേഷനുകള്ക്കാണ് ഈറ്റ് റൈറ്റ് സ്റ്റേഷന് സര്ട്ടിഫിക്കറ്റ് ലഭിച്ചതിൽ ഏറ്റവും കൂടുതല് അംഗീകാരം ലഭിച്ചത് കേരളത്തിനാണ്.
പരപ്പനങ്ങാടി, ചാലക്കുടി, തലശ്ശേരി, കണ്ണൂര്, പാലക്കാട് ജങ്ഷന്, ചെങ്ങന്നൂര്, ഷൊര്ണൂര് ജങ്ഷന്, തിരൂര്, വടകര, ചങ്ങനാശ്ശേരി, ആലപ്പുഴ, വര്ക്കല, കരുനാഗപ്പള്ളി, അങ്കമാലി, ആലുവ, തിരുവല്ല, കോട്ടയം, കോഴിക്കോട്, തൃശൂര്, തിരുവനന്തപുരം, കൊല്ലം എന്നീ റെയില്വേ സ്റ്റേഷനുകള്ക്കാണ് ഈറ്റ് റൈറ്റ് സ്റ്റേഷന് അംഗീകാരം ലഭിച്ചത്. ഭക്ഷ്യ സുരക്ഷാ ശുചിത്വ മാനദണ്ഡങ്ങള് പാലിച്ച് കൊണ്ടാണ് ഭക്ഷണം പാകം ചെയ്യുന്നതെന്നും യാത്രക്കാര്ക്ക് ഭക്ഷണം നല്കുമ്പോഴും സുരക്ഷാ മാനദണ്ഡം പാലിക്കുന്നുണ്ടെന്നും എഫ്.എസ്.എസ്.എ.ഐ. ഉറപ്പ് വരുത്തിയ ശേഷമാണ് സര്ട്ടിഫിക്കറ്റ് നല്കുന്നത്.
കേരളം ഭക്ഷ്യസുരക്ഷാ രംഗത്ത് നടത്തുന്ന മികച്ച പ്രവര്ത്തനങ്ങള്ക്കുള്ള മറ്റൊരു അംഗീകാരമാണെന്ന് ആരോഗ്യ വകുപ്പ് മന്ത്രി വീണാ ജോര്ജ് പ്രതികരിച്ചു.
About the Author
