തിരുവനന്തപുരം : മുഖ്യമന്ത്രി പിണറായി വിജയൻ പുതുപ്പള്ളിയില് എണ്ണിപ്പറഞ്ഞത് ഉമ്മന്ചാണ്ടിയുടെ വികസന നേട്ടങ്ങളെന്നു കെ.സുധാകരന്.ഉമ്മന്ചാണ്ടി സര്ക്കാരിന്റെ ഭരണ നേട്ടങ്ങളെ സ്വന്തം നേട്ടങ്ങളാക്കി പുതുപ്പള്ളിയില് നിന്ന് എണ്ണിയെണ്ണിപ്പറഞ്ഞ മുഖ്യമന്ത്രി പിണറായി വിജയന് അദ്ദേഹത്തിന്റെ സര്ക്കാരിന്റെ നേട്ടങ്ങളെ കുറിച്ച് ഒരക്ഷരം പോലും പറയാന് ഇല്ലായിരുന്നു.മുഖ്യമന്ത്രി മറുപടി പറയുമെന്ന് കേരളം പ്രതീക്ഷിച്ചിരുന്ന അനേകം ചോദ്യങ്ങളില് നിന്ന് ഒളിച്ചോടുകയും ചെയ്തതായി സുധാകരൻ പറഞ്ഞു.
മുഖ്യമന്ത്രി തന്റേതാക്കാന് ശ്രമിക്കുന്ന കണ്ണൂര് വിമാനത്താവളം, വിഴിഞ്ഞം തുറമുഖം, മലയോര ഹൈവെ തുടങ്ങിയവയെല്ലാം ഉമ്മന് ചാണ്ടിയുടെ ഭരണ നേട്ടങ്ങളാണെന്ന് ചരിത്രം രേഖപ്പെടുത്തിയിട്ടുണ്ട്. അവയൊന്നും സ്വന്തമാക്കാന് പിണറായി വിജയന് സാധിക്കില്ല. ഗെയില് പദ്ധതി, ദേശീയപാതാ തുടങ്ങിയവയ്ക്കെതിരെ സിപിഎം പ്രക്ഷോഭം നടത്തി തടസ്സപ്പെടുത്തിയില്ലായിരുന്നെങ്കില് അതും ഉമ്മന്ചാണ്ടിയുടെ ഭരണ നേട്ടത്തില് ഉള്പ്പെടുമായിരുന്നു. വികസനകാര്യത്തില് പുതുപ്പള്ളി മറ്റൊരു മണ്ഡലത്തിനും പുറകിലല്ല, മറ്റു മണ്ഡലങ്ങളെക്കാളും മുകളിലാണെന്ന് സുധാകരൻ മാധ്യമങ്ങളോട് പറഞ്ഞു.
About the Author
