റിയാദിലെ തലശ്ശേരിക്കാരുടെ കൂട്ടായ്മയായ ടി എം ഡബ്ല്യു എ റിയാദ് തലശ്ശേരി പെരുന്നാള് കൂട്ടം എന്ന പേരില് ഈദ് സംഗമം സംഘടിപ്പിച്ചു. മലാസിലെ കിംഗ് അബ്ദുള്ള ഗ്രാന്ഡ് മസ്ജിദില് അംഗങ്ങള് പെരുന്നാള് നമസ്ക്കാരത്തിനായ് ഒത്തു ചേര്ന്നു. പരസ്പരം ആശംസകളും സമ്മാനങ്ങളും കൈമാറി നാട്ടിലെ ഈദ് ഗാഹിനെ ഓര്മ്മിപ്പിക്കുന്ന രീതിയില് പെരുന്നാള് ആഘോഷമാക്കി.
മലാസ് ലുലുവില് പ്രവര്ത്തിക്കുന കാന്റീന് ലൌഞ്ച് റസ്റ്ററന്റില് ഒരുക്കിയ വിഭവ സമൃദ്ധമായ പ്രഭാത ഭക്ഷണത്തിനായി എത്തിച്ചേര്ന്ന അംഗങ്ങളെ നിര്വാഹക സമിതി അംഗങ്ങള് സ്വീകരിച്ചു. പ്രവാസ ജീവിതത്തിന്റെ നഷ്ടങ്ങളില് ഒന്നായ നാട്ടിലെ പെരുന്നാള് ആഘോഷം അതിന്റെ തനിമ ഒട്ടും കുറയാതെ റിയാദില് പുനസൃഷ്ടിച്ചതിന്റെ സന്തോഷം പരിപാടിയില് പങ്കെടുത്തവരുടെ മുഖത്ത് പ്രകടമായിരുന്നു. ഒരേ നഗരത്തിലാണ് താമസമെങ്കിലും ജീവിത തിരക്കുകള്ക്കിടയില് ഏറെ കാലങ്ങളായി പരസ്പ്പരം കാണാന് സാധിക്കാത്ത സുഹൃത്തുക്കളെയും ബന്ധുക്കളെയും കാണാന് സാധിച്ചതിന്റെ ചാരിതാര്ത്ഥ്യം പലരും മറച്ചു വെച്ചില്ല. ഒരുവേള ഈ പെരുന്നാൾ ആഘോഷം നാട്ടിൽ ആണോ എന്ന് സംശയിച്ചുവെന്ന് പരിപാടിയിൽ പങ്കെടുത്ത കുടുംബങ്ങളിൽ ഒരാൾ അഭിപ്രായപ്പെട്ടു. വിശേഷങ്ങള് പങ്കു വെച്ചും ആശംസകള് കൈമാറിയും ഗൃഹാതുരത്വത്തിന്റെ വലിയ പെരുന്നാള് കൊണ്ടാടി.
തലശ്ശേരി പെരുന്നാള് കൂട്ടം പരിപാടിക്ക് ടി എം ഡബ്ല്യു എ റിയാദ് മെമ്പര്ഷിപ്പ് വിഭാഗം സബ് കമ്മിറ്റി അംഗങ്ങളായ ഫിറോസ് ബക്കര്, മുഹമ്മദ് ഖൈസ്, അന്വര് സാദത്ത് കാത്താണ്ടി, അഷ്ക്കര് വി സി എന്നിവര് നേതൃത്വം നല്കി. ഈ ചെറിയ സമയത്തിനുള്ളില് മുന്നൂറോളം അംഗങ്ങളെ പങ്കെടുപ്പിച്ച് പരിപാടി വിജയകരമാക്കിയ സംഘാടക സമിതിയെ പ്രസിഡന്റ് തന്വീര് ഹാഷിം, ജനറല് സെക്രട്ടറി ഷമീര് തീക്കൂക്കില് എന്നിവര് അഭിനന്ദിച്ചു.
About the Author
