തിരുവനന്തപുരം : സംസ്ഥാനത്ത് വിവിധയിടങ്ങളില് കടലാക്രമണം.തിരുവനന്തപുരം, കൊല്ലം, ആലപ്പുഴ, തൃശൂര്, ജില്ലകളിലെ വിവിധ തീരപ്രദേശങ്ങളിലാണ് കടലാക്രമണം ഉണ്ടായത്.ഇത്രയധികം മേഖലകളില് കടലാക്രമണം അനുഭവപ്പെട്ടതോടെ സംസ്ഥാനത്ത് മുന്നറിയിപ്പ് പ്രഖ്യാപിച്ചു.തിരുവനന്തപുരത്ത് പുല്ലുവിള, അടിമലത്തുറ, പുതിയതുറ, പൂന്തുറ, തൂമ്പ എന്നിവിടങ്ങളിലെല്ലാം കടല് കയറി. ശക്തമായ തിരമാലകളും കാറ്റും ഇവിടങ്ങളില് അനുഭവപ്പെടുന്നുണ്ട്. പൊഴിയൂരില് വെള്ളം കയറിയതോടെ പത്തോളം കുടുംബങ്ങളെ വീടുകളില് നിന്ന് ഒഴിപ്പിച്ചു.കൊല്ലംകോട് നിന്നും നീരോടിയിലേക്കുള്ള ഭാഗത്തെ 50 വീടുകളില് വെള്ളം കയറി. പൊഴിക്കരയില് റോഡ് പൂർണമായും വെള്ളത്തിനടിയിലായി.കൊല്ലത്ത് മുണ്ടക്കലിലാണ് കടലാക്രമണം ഉണ്ടായത്. ഇവിടെയും ശക്തമായ തിരമാലകളും കാറ്റുമാണ് അനുഭവപ്പെടുന്നത്. ആലപ്പുഴയില് പുറക്കാട്, വളഞ്ഞ വഴി, ചേര്ത്തല, പള്ളിത്തോട് ഭാഗങ്ങളിലാണ് കടലാക്രമണം ഉണ്ടായത്. പുറക്കാട് രാവിലെ കടല് ഉല്വലിഞ്ഞിരുന്നു. ഇവിടെ ചെളിയടിഞ്ഞ അവസ്ഥയായിരുന്നു.
തൃശൂരില് പെരിഞ്ഞനത്താണ് കടലേറ്റം. തിരകള് ശക്തമായി കരയിലേക്ക് അടിച്ചുകയറി. വെള്ളവും മണ്ണും അടിച്ചു കയറി മത്സ്യബന്ധന വലകള്ക്ക് കേടുപാടുകള് സംഭവിച്ചിട്ടുമുണ്ട്. ഇനിയും ഉയർന്ന ശക്തമായ തിരമാലകള്ക്കും കടലാക്രമണത്തിനും സാധ്യതയുണ്ടെന്നാണ് സമുദ്രസ്ഥിതി പഠന ഗവേഷണ കേന്ദ്രത്തിന്റെ മുന്നറിയിപ്പ്.
About the Author
