ഒമാൻ : മസ്കത്ത് രാജ്യാന്തര പുസ്തക മേളയുടെ 28-ാമത് എഡിഷന് ഫെബ്രുവരി 21ന് ആരംഭിക്കും. ഒമാൻ കൺവെൻഷൻ ആന്റ് എക്സിബിഷൻ സെൻ്ററിൽ വെച്ച് മാർച്ച് രണ്ട് വരെയാണ് എക്സിബിഷൻ നടക്കുകയെന്ന് സംഘാടക സമിതി അധികൃതർ അറിയിച്ചു. സാംസ്കാരിക, പുസ്തക പ്രസിദ്ധീകരണ രംഗത്ത് ആർട്ടിഫിഷൽ ഇന്റലിജൻ്റ്സിന്റെ സ്വാധീനം എന്ന സന്ദേശത്തോടെയാണ് ഇരുപത്തിയെട്ടാമത് എഡിഷൻ സംഘടിപ്പിക്കുന്നത്.
ദാഹിറ ഗവർണറേറ്റാണ് ഈ വർഷത്തെ മേളയിലെ പ്രധാന അതിഥി. 34 രാജ്യങ്ങളിൽ നിന്നുള്ള 847 പ്രസാധകരാണ് എക്സിബിഷനിൽ പങ്കെടുക്കുക. ലോക ഭാഷകളിൽ നിന്നുള്ള 6,22,000 പുസ്തകങ്ങൾ ഇവിടെ ലഭ്യമാക്കും. ഇതിൽ 20,000 പുസ്തകങ്ങൾ ഇംഗ്ലീഷിലും 2,68,000 പുസ്തകങ്ങൾ അറബിയിലുമായിരിക്കുമെന്ന് സംഘാടകർ വ്യക്തമാക്കി.
ഇത്തവണത്തെ പുസ്തക മേളയിലെ ഏറ്റവും കൂടുതൽ പുസ്തകങ്ങളും പ്രസാധകരും എത്തുന്നത് ഈജിപ്തിൽ നിന്നാണ്. രണ്ടാം സ്ഥാനത്താണ് ഒമാനാണ്.
About the Author
