റിയാദ്: വായനയും സർഗ്ഗശേഷിയും ഉല്ലാസവും പരിപോഷിപ്പിക്കുന്നതിനായികുട്ടികൾക്കും വനിതകൾക്കുമായി ‘ഇൻഫോടെയ്നർ’ എന്ന പേരിൽ ക്ലബ്ബിന് തുടക്കം കുറിച്ചു. റിയാദ് ഷിഫയിലെ റഹ്മാനിയ ഓഡിറ്റോറിയത്തിൽ നടന്ന പരിപാടിയിൽ ഉമ്മർ അമാനത്ത് അധ്യക്ഷത വഹിച്ചു. സുലൈമാൻ വിഴിഞ്ഞം പരിപാടി ഉദ്ഘാടനം ചെയ്തു. ഷിഹാബുദീൻ കുഞ്ഞീസ്, സലീം ചാലിയം തുടങ്ങിയവർ കുട്ടികളുമായി സംവദിച്ചു. ചടങ്ങിൽ ഷിബു പത്തനാപുരം, ഷംസു പെരുമ്പട്ട, മനാഫ് മണ്ണൂർ, എന്നിവർ സംസാരിച്ചു. പ്രവാസ ലോകത്ത് കുട്ടികളിലും വനിതകളിലും വായനശീലം വളർത്തുകയും അവരുടെ മാനസിക ഉല്ലാസത്തിനുതകുന്ന വിവിധ പ്രവർത്തനങ്ങൾ ക്രോഡീകരിക്കുകയുമാണ് ക്ലബ്ബിന്റെ ലക്ഷ്യമെന്ന് കോർഡിനേറ്റർ റെജുല മനാഫ് വിശദീകരിച്ചു. മരുഭൂമിയിലെ ആടിനെയും ഒട്ടകങ്ങളെ മേയ്ക്കുന്ന തൊഴിലാളികൾക്കുള്ള ബ്ലാങ്കറ്റും ജാക്കറ്റും വിതരണം ചെയ്യുന്ന കാരുണ്യ പ്രവർത്തനത്തിന് പിന്തുണയേകിയ കുട്ടികൾക്കുള്ള സർട്ടിഫിക്കറ്റ് സുലൈമാൻ വിഴിഞ്ഞം വിതരണം ചെയ്തു. ക്ലബ്ബിന്റെ ഭാഗമായി ലൈബ്രറി പ്രവർത്തനം ആരംഭിച്ചു. മാസ്റ്റർ നൗഫൽ സ്വാഗതവും മാസ്റ്റർ ഹാസിൽ ജസാർ നന്ദിയും പറഞ്ഞു. കുട്ടികളുടെയും രക്ഷിതാക്കളുടെയും പങ്കാളിത്തം കൊണ്ടും അഥിതികളുടെ വേറിട്ട അവതരണം കൊണ്ടും പരിപാടി ശ്രദ്ധേയമായി. സഫ ഷംസ് അവതരികയായിരുന്നു.
About the Author
