റിയാദ്: കേരളത്തിന്റെ സാമ്പത്തിക വളർച്ചയ്ക്കും നാടിന്റെ പുരോഗതിക്കും നിർണായക സംഭാവനകൾ നൽകുന്ന പ്രവാസി സമൂഹത്തോടുള്ള സർക്കാരിന്റെ അവഗണനയിൽ നവോദയ റിയാദ് ശക്തമായ പ്രതിഷേധം രേഖപ്പെടുത്തുന്നു.
പ്രവാസികളുടെ ആരോഗ്യസുരക്ഷ ഉറപ്പാക്കുന്നതിനായി നടപ്പിലാക്കിയ നോർക്ക കെയർ പ്ലസ് ഇൻഷുറൻസ് പദ്ധതിയുടെ പ്രീമിയം മൂന്നിരട്ടിയായി വർധിപ്പിച്ച നടപടി സാധാരണക്കാരായ പ്രവാസികൾക്ക് വലിയ സാമ്പത്തികഭാരമാണ് സൃഷ്ടിക്കുന്നത്. വർധിച്ച ജീവിതച്ചെലവും തൊഴിൽപരമായ അനിശ്ചിതത്വങ്ങളും നേരിടുന്ന പ്രവാസികൾക്ക് താങ്ങാനാവുന്ന നിരക്കിൽ ആരോഗ്യ ഇൻഷുറൻസ് ലഭ്യമാക്കേണ്ടതിനു പകരം, അവരുടെ സാമ്പത്തിക ബാധ്യത വർധിപ്പിക്കുന്ന സമീപനം പ്രതിഷേധാർഹമാണ്.
പ്രവാസികളുടെ ക്ഷേമം ഉറപ്പാക്കുമെന്ന് വാഗ്ദാനം ചെയ്യുന്ന സർക്കാർ, പ്രവാസികളുടെ യഥാർഥ പ്രശ്നങ്ങൾ പരിഹരിക്കുന്നതിൽ ആവശ്യമായ ഗൗരവം കാണിക്കുന്നില്ലെന്ന ആശങ്ക ശക്തമാണ്. പ്രത്യേകിച്ചും, അർഹരായ നിരവധി പ്രവാസികൾക്ക് പ്രവാസി പെൻഷൻ കൃത്യമായി ലഭിക്കാത്ത സാഹചര്യം അവരുടെ ജീവിതം കൂടുതൽ ദുരിതപൂർണമാക്കുന്നു. വർഷങ്ങളോളം വിദേശരാജ്യങ്ങളിൽ കഠിനാധ്വാനം ചെയ്ത് നാടിന്റെ വികസനത്തിനായി സമ്പാദ്യവും അധ്വാനവും സമർപ്പിച്ചവരുടെ വാർധക്യകാല സുരക്ഷ ഉറപ്പാക്കേണ്ടത് സർക്കാരിന്റെ ഉത്തരവാദിത്തമാണ്.
പ്രവാസികളെ വെറും വരുമാനസ്രോതസ്സായി കാണാതെ, അവകാശങ്ങളും ആവശ്യങ്ങളുമുള്ള പൗരന്മാരായി പരിഗണിക്കാൻ സർക്കാർ തയ്യാറാകണം. ഇൻഷുറൻസ് പ്രീമിയം വർധന പുനഃപരിശോധിച്ച് താങ്ങാനാവുന്ന നിരക്കിലേക്ക് കുറയ്ക്കുകയും, പ്രവാസി പെൻഷൻ കുടിശ്ശികകൾ തീർത്ത് അർഹരായ എല്ലാവർക്കും പെൻഷൻ സമയബന്ധിതമായി ലഭ്യമാക്കുകയും വേണം.
പ്രവാസികളുടെ ആരോഗ്യസംരക്ഷണം, സാമൂഹികസുരക്ഷ, പെൻഷൻ, പുനരധിവാസം തുടങ്ങിയ വിഷയങ്ങളിൽ വ്യക്തമായ നടപടികൾ സ്വീകരിക്കണമെന്നും പ്രവാസി സമൂഹത്തിന്റെ ആശങ്കകൾ പരിഹരിക്കാൻ സർക്കാർ അടിയന്തരമായി ഇടപെടണമെന്നും നവോദയ റിയാദ് ആവശ്യപ്പെടുന്നു.
പ്രവാസികളുടെ അവകാശങ്ങൾ സംരക്ഷിക്കപ്പെടണം. അവരുടെ അധ്വാനത്തിനും ത്യാഗത്തിനും അർഹമായ പരിഗണന ലഭിക്കണം. പ്രവാസി സമൂഹത്തിന്റെ ന്യായമായ ആവശ്യങ്ങൾ അംഗീകരിക്കുന്നതുവരെ നവോദയ റിയാദ് ശക്തമായ നിലപാടുമായി മുന്നോട്ടുപോകും.
About the Author
