വേൾഡ് മലയാളി ഫെഡറേഷൻ ബാങ്കോക്ക് കൺവെൻഷൻ മന്ത്രി റോഷി അഗസ്റ്റിൻ ഉദ്‌ഘാടനം ചെയ്യും

വെബ്ഡെസ്‌ക്

എറണാകുളം : ആഗോള മലയാളി പ്രവാസി സംഘടനയായ വേൾഡ് മലയാളി ഫെഡറേഷന്റെ ബാങ്കോക്കിൽ വച്ച് നടക്കുന്ന നാലാമത് ദ്വിവത്സര ഗ്ലോബൽ കൺവെൻഷൻ മന്ത്രി റോഷി അഗസ്റ്റിൻ ഉദ്ഘടനം ചെയ്യും. ജനുവരി 26, 27 തീയതികളിൽ ബാങ്കോക്കിലെ അംബാസഡർ ഹോട്ടലാണ് കൺവെൻഷൻ വേദി. 164 രാജ്യങ്ങളിൽ നിന്നായി ഏകദേശം 400 ഓളം പ്രതിനിധികൾ സമ്മേളനത്തിൽ പങ്കെടുക്കുമെന്ന് വേൾഡ് മലയാളി ഫെഡറേഷൻ ഗ്ലോബൽ ചെയർമാൻ ഡോ. പ്രിൻസ് പള്ളിക്കുന്നേൽ വാർത്താസമ്മേളനത്തിൽ അറിയിച്ചു.
രണ്ടു ദിവസങ്ങളിലായി നടക്കുന്ന സമ്മേളനത്തിൽ കേരളത്തിൽ നിന്നുള്ള നിയമസഭാ അംഗങ്ങളായ മോൻസ് ജോസഫ്, ഷാഫി പറമ്പിൽ, റോജി എം ജോൺ, വേൾഡ് മലയാളി ഫെഡറേഷന്റെ ഗ്ലോബൽ പാട്രൺ ജനാബ് സയ്യിദ് മുനവ്വറലി ശിഹാബ് തങ്ങൾ തുടങ്ങിയവരും വ്യവസായ പ്രമുഖരും, കലാകാരന്മാരും ഉൾപ്പെടെ വിവിധ വ്യക്തിത്വങ്ങൾ പങ്കെടുക്കും.
ഇസാഫ് (ESAF) ഗ്രൂപ്പ് ഓഫ് സോഷ്യൽ എന്റർപ്രൈസസിന്റെ സ്ഥാപകൻ കെ പോൾ തോമസ്, ഡോ. മുരളി തുമ്മാരുക്കുടി, പ്രമുഖ വ്യവസായിയും വേൾഡ് മലയാളി ഫെഡറേഷന്റെ പാർട്ണറും കൂടിയായ ഡോ. സിദ്ദിഖ് അഹമദ്, കവിയും മലയാളം മിഷൻ ഡയറക്ടറുമായ മുരുകൻ കാട്ടാക്കട എന്നിവർ സമ്മേളനത്തിൽ പങ്കെടുക്കും. കൺവെൻഷനോടനുബന്ധിച്ച് നടക്കുന്ന വനിതാ ഫോറം പരിപാടിയിൽ “വോയിസ് ഓഫ് വുമൺ സഹ” യിൽ ആരോഗ്യ പ്രവർത്തകയും എഴുത്തുകാരിയും സോഷ്യൽ മീഡിയ ഇൻഫ്ലുൻസറുമായ ഡോ. ഫാത്തിമ അസ്‌ല സംസാരിക്കും. ഭിന്നശേഷി കുഞ്ഞുങ്ങളുടെ മാതാ പിതാക്കൾ നേരിടുന്ന വെല്ലുവിളികളുടെ ശബ്ദമായി വോയിസ്‌ ഓഫ് വുമനിൽ WMF ഇറ്റലി കൗൺസിൽ പ്രസിഡന്റ്‌ ഡോ. അൻസമ്മ, അഡ്വൈസറി ബോർഡ്‌ അംഗം സിന്ധു സജീവ് (കേരള ) എന്നിവർ പ്രബന്ധം അവതരിപ്പിക്കും. വിവിധമേഖലകളിൽ നിന്നുള്ള മികവുറ്റ വ്യക്തിത്വങ്ങളെ ആദരിക്കൽ ചടങ്ങിൽ കലാ മേഖലയിലെ ശ്രേഷ്ഠ സംഭവനകൾക്ക് വിശ്വകലാശ്രീ പുരസ്‌കാരം ശ്രീ സൂര്യ കൃഷ്ണാമൂർത്തിക്ക് നൽകും. ഇതോടൊപ്പം നടക്കുന്ന സാംസ്‌കാരിക പരിപാടികളിൽ പ്രശസ്ത ഗായകരായ അതുൽ നറുകര, അരുൺ ഗോപൻ അഞ്ജു ജോസഫ്, അവതാരകരായ രാജ്‌ കലേഷ്, മാത്തുക്കുട്ടി, കലാഭവൻ കെ എസ് പ്രസാദ്, മെന്റലിസ്റ്റ് അൽത്താഫ് ഹാജ എന്നിവരുടെ പരിപാടികൾ ഉണ്ടായിരിക്കും.
കൊച്ചിയിൽ ഹോട്ടൽ അബാദ് പ്ലാസയിൽ വച്ച് നടന്ന പത്ര സമ്മേളനത്തിൽ ഗ്ലോബൽ പ്രസിഡന്റ്‌ ഡോ. ജെ രത്നകുമാർ, ഗ്ലോബൽ കോർഡിനേറ്റർ പൗലോസ് തേപ്പാല, ഗ്ലോബൽ പബ്ലിക് റിലേഷൻസ് ഫോറം കോർഡിനേറ്റർ റഫീഖ് മരക്കാർ, ഗ്ലോബൽ ചാരിറ്റി കോർഡിനേറ്റർ വി.എം.സിദ്ധീഖ്, മിഡിൽ ഈസ്റ്റ് റീജിയൻ പ്രസിഡന്റ് റിജാസ് ഇബ്റാഹിം, കേരള സ്റ്റേറ്റ് കൗൺസിൽ പ്രസിഡൻ്റ് ടി.ബി.നാസർ എന്നിവർ പങ്കെടുത്തു.